Usoro mmadụ ga-eso tụọ atụmatụ ndụ ya: Nkeji nke mbụ, ọmụmụihe nke abụọ

Ọ̀mụ̀mụ̀ihe a bụ ịga n’ihu n’ọ̀mụ̀mụ̀ihe “Usoro mmadụ ga-eso tụọ atụmatụ ndụ ya”. Ọ na-enye nnukwu aka ịmụta ka e si-atụ atụmatụ ndụ, ka onye ọbụla chee ihu n’ime ihe na-enye afọ-ojuju, ma zeere ihe na-akpata igbu oge, nmefu akụ na ụba na ọnọdụ ịta ikikere eze nihi amaghị ihe a ga-eme. A kọwara nzọụkwụ atọ na-eso nzọụkwụ abụọ a kọwara n’ọ̀mụ̀mụ̀ihe nke mbụ n’ịtụ atụmatụ ndụ. Na ngwụcha nkọwa nzọụkwụ, onye na-amụ ihe ga-eme ihe omume ga-enyere ya aka inwe ezigbo nghọta na ịzọ nzọụkwụ ahụ. Ọtụtụ ndị Nigeria gụchaa akwụkwọ, ha anaghị ama ihe ha ga-eme na-akpata ego, na-ebi ezi ndụ ga-enye ha afọ-ojuju, nakwa na-enye aka na mmepe obodo. Mgbagwojuanya na ahụhụ na-esi n’ọnọdụ a apụta emeela ọtụtụ mmadụ akwụọ ụdọ ma ọ bụ nwee akụkọ ọzọ na-agba anyammiri. Ihe na-ebute ọnọdụ a bụ na ndị mmadụ anaghị atụ atụmatụ maka ndụ ha nihi na ha amaghị ka e si-eme ya.